ਬੇਗਾਨਿਆਂ ਨੂੰ ਰੋਣਾ ਛੱਡ

ਬੇਗਾਨਿਆਂ ਨੂੰ ਰੋਣਾ ਛੱਡ




ਛੱਡ ਗਏ ਜਿਹੜੇ ਤੈਨੂੰ , ਰੋਂਦੇ ਕੁਰਲਾਉਂਦੇ ਨੂੰ ,

ਪਾਲੋ ਪਾਲ ਅੱਖ਼ੀਆਂ ਚੋ' , ਅੱਥਰੂ ਵਹਾਉਂਦੇ ਨੂੰ ,

ਉਹਨਾਂ ਵਾਰੇ ਸੋਚ ਹੁਣ , ਤੂੰ ਵੀ ਦੁੱਖ਼ੀ ਹੋਣਾ ਛੱਡ ।

ਛੱਡ ਦਿਲਾਂ ਛੱਡ ਤੂੰ , ਬੇਗਾਨਿਆਂ ਨੂੰ ਰੋਣਾ ਛੱਡ ॥





ਜਿੰਨਾ ਨਾਲ ਤੇਰੇ ਕਦੀ , ਗੂੜ੍ਹ ਯਾਰਾਨੇ ਸੀ ।

ਤੇਰੇ ਨਹੀਂ ਸੱਚੀਂ , ਉਹਤਾਂ ਗੈਰ ਸੀ ,ਬੇਗਾਨੇ ਸੀ ।

ਹੰਝੂਆਂ ਦੇ ਨਾਲ ਅੱਖ਼ਾਂ , ਵਾਰ ਵਾਰ ਧੋਣਾ ਛੱਡ ।

ਛੱਡ ਦਿਲਾਂ ਛੱਡ ਤੂੰ.............. .........॥





ਦੁੱਧ ਚ' ਛੁਹਾਰੇ ਪਾ ਤੂੰ , ਜਿੰਨਾ ਨੂੰ ਪਿਲਾਉਂਦਾ ਰਿਹਾ ।

ਸੀਨੇ ਵਿੱਚੋਂ ਮਾਸ ਕੱਢ , ਭੁੰਨ ਕੇ ਖ਼ੁਵਾਉਂਦਾ ਰਿਹਾ ।

ਯਾਦਾਂ ਵਾਲਾ ਬੋਝ ਹੁਣ , ਮੋਢਿਆਂ 'ਤੇ ਢੋਣਾ ਛੱਡ ।

ਛੱਡ ਦਿਲਾਂ ਛੱਡ ਤੂੰ.............. .........॥





ਕੀ ਕੀਤਾ ਉਹਨਾਂ ਲਈ , ਹੁਣ ਬਹੁਤਾ ਸੋਚ ਨਾ ਤੂੰ ।

ਅਹਿਸਾਨ ਚੁਕਾਉਣਗੇ ਉਹ, ਛੱਡ ਪਰਾਂ੍ਹ ਲੋਚ ਨਾ ਤੂੰ ।

ਕਿੱਥੇ ਤੈਥੋਂ ਭੁੱਲ ਹੋਈ ,ਬੀਤੇ ਵਿੱਚੋਂ ਟੋਹਣਾ ਛੱਡ ।

ਛੱਡ ਦਿਲਾਂ ਛੱਡ ਤੂੰ.............. .........॥




ਤੇਰੇ ਹੁੰਦੇ ਤੇਰੇ ਨਾਲ , ਨਿਭਦੇ ਅਖ਼ੀਰ ਤੱਕ ।

ਫਿਰੇ ਸੀ ਜ਼ੁਬਾਨੋਂ,ਹੁਣ ਮਾਰ ਲਈ ਜ਼ਮੀਰ ਤੱਕ ।

ਮਰੀਆਂ ਜ਼ਮੀਰਾਂ ਵਾਲੇ , ਪਾਸੇ ਤੂੰ ਖ਼ਲੋਣਾ ਛੱਡ ।

ਛੱਡ ਦਿਲਾਂ ਛੱਡ ਤੂੰ.............. .........॥



ਉਹਨਾਂ ਬਾਰੇ ਸੋਚ , ਕਰੀ ਜਾਵੇਂ ਪਛਤਾਵੇ ਨੂੰ ।

ਤੇਰੇ ਸੀ ਕਦੇ ਉਹ,ਛੱਡ ਕਰਨਾ ਇਹ ਦਾਅਵੇ ਨੂੰ ।

ਆਪਣੀ ਜ਼ੁਬਾਨੋ , ਸਭ ਥਾਂਵਾਂ ਤੇ ਬਗੋਣਾ ਛੱਡ ।

ਛੱਡ ਦਿਲਾਂ ਛੱਡ ਤੂੰ.............. .........॥



ਸੰਭਲ ਜਾ ਵੇਲੇ ਸਿਰ, ਹਾਲੇ ਵੀ "ਘੁਮਾਣ" ਤੂੰ ।

ਬੀਤੇ ਕੱਲ੍ਹ ਬਾਰੇ ਸੋਚ , ਹੋ ਨਾ ਪ੍ਰੇਸ਼ਾਨ ਤੂੰ ।

ਗੁਜ਼ਰੇ ਦਿਨਾਂ ਨੂੰ ਪਾ ਕੇ , ਚੱਕੀ ਵਿੱਚ ਝੋਣਾ ਛੱਡ ।

ਛੱਡ ਦਿਲਾਂ ਛੱਡ ਤੂੰ.............. .........

ਛੱਡ ਦਿਲਾਂ ਛੱਡ ਤੂੰ ,ਬੇਗਾਨਿਆਂ ਨੂੰ ਰੋਣਾ ਛੱਡ ।





ਲੇਖਕ : ਜਰਨੈਲ ਘੁਮਾਣ


ਮੋਬਾਇਲ ਨੰਬਰ : +91-98885-05577

Email :ghuman5577@yahoo.com