ਗ਼ਮਾਂ ਦੀਆਂ ਮਹਿਫ਼ਲਾਂ

ਸਾਡੇ ਵੇਹੜੇ ਲੱਗਦੀਆਂ , ਗ਼ਮਾਂ ਦੀਆਂ ਮਹਿਫ਼ਲਾਂ ।



ਹੰਝੂਆਂ ਚੋਂ ਹਾਸਿਆਂ ਨੂੰ ,

ਚਿਰਾਂ ਤੋਂ ਗੁਆਚਿਆਂ ਨੂੰ ,

ਰੋ ਰੋ ਕੇ ਲੱਭਦੀਆਂ ... ਗ਼ਮਾਂ ਦੀਆਂ ਮਹਿਫ਼ਲਾਂ ।

ਸਾਡੇ ਵੇਹੜੇ ਲੱਗਦੀਆਂ , ਗ਼ਮਾਂ ਦੀਆਂ ਮਹਿਫ਼ਲਾਂ ॥



ਘੜੀ ਸੀ ਕੁਲੈਹਣੀ , ਜਿਸ ਵੇਲੇ ਉਹ ਛੱਡ ਗਏ ,

ਹਿਜ਼ਰਾਂ ਦੇ ਤਿੱਖੇ ਤੀਰ , ਸੀਨੇ ਵਿੱਚ ਗੱਡ ਗਏ ,

ਰੂਹ ਕੁਰਲਾਈਂ ਜਾਵੇ ,

ਰੂਦਨ ਮਚਾਈਂ ਜਾਵੇ ,

ਵੈਣ ਪਾ ਪਾ ਫੱਬਦੀਆਂ ....ਗ਼ਮਾਂ ਦੀਆਂ ਮਹਿਫ਼ਲਾਂ ।

ਸਾਡੇ ਵੇਹੜੇ ਲੱਗਦੀਆਂ , ਗ਼ਮਾਂ ਦੀਆਂ ਮਹਿਫ਼ਲਾਂ ॥



ਭਾਵੇਂ ਉਹਨਾਂ ਆਉਣਾ ਨਹੀਂ , ਫੇਰ ਵੀ ਉਡੀਕ ਜਿਹੀ ,

ਆਉਣ ਦੀ ਉਮੀਦ , ਉਂਝ ਪਾਣੀ ਉੱਤੇ ਲ਼ੀਕ ਜਿਹੀ ,

ਫੇਰ ਵੀ ਹੈ ਆਸ ਜੇਹੀ ,

ਅੰਦਰੋਂ ਨਿਰਾਸ਼ ਜੇਹੀ ,

ਖੁਦ ਤਾਂਈਂ ਠੱਗਦੀਆਂ .......... ਗ਼ਮਾਂ ਦੀਆਂ ਮਹਿਫ਼ਲਾਂ ।

ਸਾਡੇ ਵੇਹੜੇ ਲੱਗਦੀਆਂ , ਗ਼ਮਾਂ ਦੀਆਂ ਮਹਿਫ਼ਲਾਂ ॥




ਆਉਣਾ ਹੁੰਦਾ ਜਾਂਦੇ ਨਾ ਓਹ , ਗਏ ਮੁੜ ਆਉਣੇ ਕਿਥੋਂ ,

ਚੁੱਗਦੇ ਜੋ ਚੋਗ , ਚੋਗੇ ਦਿਲਾਂ ਤੂੰ ਚੁਗਾਉਣੇ ਕਿਥੋਂ ,

ਹੀਰੇ ਮੋਤੀ ਚੁੱਗਦੇ ਨੇ ,

ਤੈਥੋਂ ਕਿੱਥੇ ਪੁੱਗਦੇ ਨੇ ,

ਗ਼ਰੀਬੀ ਚ' ਨਾ ਰੱਜ ਦੀਆਂ ....ਗ਼ਮਾਂ ਦੀਆਂ ਮਹਿਫ਼ਲਾਂ ।

ਸਾਡੇ ਵੇਹੜੇ ਲੱਗਦੀਆਂ , ਗ਼ਮਾਂ ਦੀਆਂ ਮਹਿਫ਼ਲਾਂ ॥




ਮਰੇ ਮੁੱਕੇ ਪਿਆਰ ਦਾ , ਮਨਾਉਂਦੀਆਂ ਨੇ ਸੋਗ ਇਹ ,

ਚੰਗੇ ਕੰਮ ਲਾ ਗਿਆ ਹੈ ,ਇਸ਼ਕੇ ਦਾ ਰੋਗ ਇਹ,

ਅੱਖ਼ਾਂ ਅਤੇ ਦਿਲ ਰੋਵੇ ,

ਪਲ ਵੀ ਨਾ ਚੁੱਪ ਹੋਵੇ ,

ਨਦੀ ਵਾਂਗੂੰ ਵਗਦੀਆਂ ... ਗ਼ਮਾਂ ਦੀਆਂ ਮਹਿਫ਼ਲਾਂ ।

ਸਾਡੇ ਵੇਹੜੇ ਲੱਗਦੀਆਂ , ਗ਼ਮਾਂ ਦੀਆਂ ਮਹਿਫ਼ਲਾਂ ॥




ਹੋਰ ਔਖਾ ਹੋਈਏ , ਜਦੋਂ ਯਾਦਾਂ ਦੀ ਪਟਾਰੀ ਖ਼ੁੱਲੇ ,

ਸੱਜਣੋ " ਘੁਮਾਣ " ਘਰ , ਦੁੱਖ਼ਾਂ ਦੀ ਹਨ੍ਹੇਰੀ ਝੁੱਲੇ ,

ਪਿੱਪਲਾਂ ਦੀ ਛਾਂ ਉਹ ,

ਸੁੰਨੀ ਸੁੰਨੀ ਥਾਂ ਉਹ ,

ਲਾਟਾਂ ਬਣ ਮੱਘਦੀਆਂ .. ਗ਼ਮਾਂ ਦੀਆਂ ਮਹਿਫ਼ਲਾਂ ।

ਸਾਡੇ ਵੇਹੜੇ ਲੱਗਦੀਆਂ , ਗ਼ਮਾਂ ਦੀਆਂ ਮਹਿਫ਼ਲਾਂ ॥




ਲੇਖਕ : ਜਰਨੈਲ ਘੁਮਾਣ


ਮੋਬਾਇਲ ਨੰਬਰ : +91-98885-05577

Email :ghuman5577@yahoo.com