ਚੰਡੀਗੜ੍ਹ ਸ਼ਹਿਰ ਨੇ

ਬੜੇ ਦੁੱਖ਼ ਦਿੱਤੇ ਤੇਰੇ , ਚੰਡੀਗੜ੍ਹ ਸ਼ਹਿਰ ਨੇ ॥





ਭਾਵੇਂ ਸੋਹਣਾ ਸ਼ਹਿਰ ਹੈ ਇਹ , ਦੁਨੀਆਂ ਚ' ਮੰਨਿਆਂ ,

ਅਸੀਂ ਸੋਹਣਾ ਕਹੀਏ ਇਹਨੂੰ, ਦਿਲ ਨਹੀ ਮੰਨਿਆਂ ,

ਜਿੱਦਣ ਤੋਂ ਵਸੇ ਨਹੀਂਓ , ਜਮੇਂ ਸਾਡੇ ਪੈਰ ਨੇ ।

ਬੜੇ ਦੁੱਖ਼ ਦਿੱਤੇ ਤੇਰੇ , ਚੰਡੀਗੜ੍ਹ ਸ਼ਹਿਰ ਨੇ ॥




ਲੋਕਾਂ ਲਈ ਸੋਹਣਾ ਹੋਣਾ, ਅਸੀਂ ਸੋਹਣਾ ਕਹੀਏ ਕਿਵੇਂ ,

ਸੋਹਣਿਆਂ ਬਗੈਰ ਭਲਾ , ਸੋਹਣੇ ਸ਼ਹਿਰ ਰਹੀਏ ਕਿਵੇਂ ,

ਭੁੱਲ ਗਈਆਂ ਮੰਜ਼ਿਲਾਂ , 'ਤੇ ਸਮੇਂ ਚੱਲੇ ਠਹਿਰ ਨੇ ।

ਬੜੇ ਦੁੱਖ਼ ਦਿੱਤੇ ਤੇਰੇ .........................॥



ਏਸੇ ਸ਼ਹਿਰ ਆ ਕੇ , ਸਾਡਾ ਪਿਆਰ ਗੁਆਚਿਆ ,

ਸੋਹਣਾ ਸੋਹਣਾ , ਕੋਮਲ ਜਾ ਯਾਰ ਗੁਆਚਿਆ ,

ਦਿਲ ਦੇ ਪਿਆਰਿਆਂ ਨਾ , ਪਏ ਸਾਡੇ ਵੈਰ ਨੇ ।

ਬੜੇ ਦੁੱਖ਼ ਦਿੱਤੇ ਤੇਰੇ .........................॥



ਰੌਕ ,ਰੋਜ਼ ਬਾਗਾਂ ਵਿੱਚ , ਡਰਦੇ ਨਹੀਂ ਜਾਈਦਾ ,

ਯਾਦਾਂ ਦਿਆਂ ਕੰਡਿਆਂ ਤੋਂ, ਖੁਦ ਨੂੰ ਬਚਾਈਦਾ ,

ਸੀਨੇ ਉਤੇ ਪੱਛ ਲਾਏ , ਪਾਰਕਾਂ ਦੀ ਸੈਰ ਨੇ ।

ਬੜੇ ਦੁੱਖ ਦਿੱਤੇ ਤੇਰੇ .......... ॥



ਝੀਲ਼ ਸੁਖਨਾ ਤੇ ਗਏ , ਘੁੰਮਦੇ ਘੁੰਮਾਉਂਦੇ ਅਸੀਂ ,

ਉਦਾਸੀਆਂ ਨਿਰਾਸ਼ੀਆਂ ਤੋਂ, ਖੁਦ ਨੂੰ ਬਚਾਉਂਦੇ ਅਸੀਂ ,

ਝੀਲ ਭਰ ਦਿੱਤੀ ਵਗੀ , ਹੰਝੂਆਂ ਦੀ ਨਹਿਰ ਨੇ ।

ਬੜੇ ਦੁੱਖ ਦਿੱਤੇ ਤੇਰੇ ..............॥



ਤੇਰੇ ਨਾ ਬਿਤਾਏ ਪਲ , ਥਾਂਈਂ ਥਾਂਈਂ ਲੱਭੀਏ ,

ਕਦੋਂ ਉਹਲੇ ਬੈਠ , ਮੋਤੀ ਪਿਆਰ ਵਾਲੇ ਚੱਬੀਏ ,

ਖੋਹ ਲਏ ਹਾਸੇ ਸਾਥੋਂ , ਈਰਖ਼ਾ ਦੇ ਜ਼ਹਿਰ ਨੇ ।

ਬੜੇ ਦੁੱਖ਼ ਦਿੱਤੇ ਤੇਰੇ .......... ...........॥




ਘੜੀ ਮੁੜੀ ਯਾਦ ਆਉਣ , ਤੇਰੀਆਂ ਸ਼ਰਾਰਤਾਂ ,

ਦੱਬ ਲਈ ਹੂਕ ਸਾਡੀ , ਉੱਚੀਆਂ ਇਮਾਰਤਾਂ ,

ਕਿਸੇ ਵੀ ਨਾ ਹੰਝੂ ਪੂੰਝੇ ,ਵਗੇ ਚੱਤੋ ਪਹਿਰ ਨੇ ।

ਬੜੇ ਦੁੱਖ਼ ਦਿੱਤੇ ਤੇਰੇ ........ .............॥



ਪੱਥਰ ਦਿਲਾਂ ਦੇ ਲੋਕੀ , ਪੱਥਰਾਂ ਦਾ ਛਾਇਆ ਹੈ ,

ਪੱਥਰ ਦਿਲਾਂ ਨੇ , ਸਾਨੂੰ ਪੱਥਰ ਬਣਾਇਆ ਹੈ ,

ਪੱਥਰਾ ਦਾ ਸ਼ਹਿਰ ਤਾਹੀਂਓ ,ਕਿਹਾ ਕਿਸੇ ਸ਼ਾਇਰ ਨੇ ।

ਬੜੇ ਦੁੱਖ਼ ਦਿੱਤੇ ਤੇਰੇ ........... ...........॥



ਵੱਡੇ ਸ਼ਹਿਰ ਵੱਸਣੈ " ਘੁਮਾਣ " ਨੂੰ ਫਤੂਰ ਸੀ ,

ਪਰ ਕਿੰਨਾ ਸੋਹਣਾ , ਸਾਡਾ ਸ਼ਹਿਰ ਸੰਗਰੂਰ ਸੀ ,

ਉਥੇ ਮੇਰੇ ਆਪਣੇ , 'ਤੇ ਇੱਥੇ ਸਭੈ ਗੈਰ ਨੇ ।

ਬੜੇ ਦੁੱਖ਼ ਦਿੱਤੇ ਤੇਰੇ ....................॥

ਬੜੇ ਦੁੱਖ਼ ਦਿੱਤੇ ਤੇਰੇ , ਚੰਡੀਗੜ੍ਹ ਸ਼ਹਿਰ ਨੇ ॥



ਲੇਖਕ : ਜਰਨੈਲ ਘੁਮਾਣ


ਮੋਬਾਇਲ ਨੰਬਰ : +91-98885-05577

Email :ghuman5577@yahoo.com